خلاص! قربنا نوصل ترى! هذا المرشد السياحي اللي طلعنا فوق الطعس يلتفت علينا وبالفيت يبشرنا, احنا كنا 6 سياح بالنسبة له بعضهم منهد حيلهم من التعب والباقيين حاطين كريمات حماية من الشمس كل واحد كأنه مومياء! المكان عبارة عن محمية طبيعية اسمها سوسسفلاي وحجمها عبارة عن 580 الف هكتار! يعني مساحة بلجيكا واسكوتلندا مع بعض, كن نركب الطعس اللي طوله 70 متر ماشيين ورا بعض. من صجكم انتوا؟ مقعديني من الساعة 4 الفجر علشان اروح اشوف طعوس؟ وامشي عليها؟ ولا كأني مشيت على الطعوس في حياتي في سيلين ولا العديد. بالنسبة لي المشي على الطعس نفس المشي مع الجلب بالنسبة لهم. لكن بما اني معاهم في هالرحلة قلت خل العب دور السايح واروح. بلا شك كل شوي حد يلتفت علي ويسأل: ها نفس بلادك؟ نفس صحراكم؟ وين احلى هني ولا هناك؟ جوابي هو الشي اللي اكتشفته من بعد زيارتي لهالصحراء والصحراء الكبرى والربع الخالي: كل صحراء لها هوية مختلفة, روح غريبة, احساس مختلف, سلوك مختلف, شخصية مختلفة! احس بالفخر دايما لما ينادوني ولد الصحراء او رجل الرمال, مع اني في الواقع مجرد شاب عربي خليجي عايش في المدينة! هذه كانت من اجمل لحظات ال11 يوم اللي مريتهم في ناميبيا, خلوني ابدا الحين معاكم من اليوم الاول.

اميبيا تعتبر من اهم محطات رحلة قلب الكوكب خصوصا انها البلد الوحيدة اللي فيها وايد اوف رود وبطول فيها وايضا تعتبر الاجمل في كل الرحلة خصوصا اني بقعد فيها اكثر من 10 ايام اقطعها من الشمال الى الجنوب. وعلى كثر مالبلد جميلة وبطول فيها, اجراءات اصدار تأشيرتها صعبة جدا! وكنت مستميت اطلع التأشيرة لأني مابي ينتهي فيني المطاف كالمعتاد اطلع قبل ولا اروح بوتسوانا وانطر الباقي ولا التقي فيهم في جنوب افريقيا! كلش مب حلوة! علشان جذي في يوم عبور الحدود الى ناميبيا كنت وايد احاتي, ياترى بيطوفوني ولا لا؟ اكيد بيقولون لي شلون طلعت هالفيزا؟ ولا ارجع مانقدر اندخلك؟ او اي نوع من التعقيد, لكن الصدمة كانت انها اسهل حدود عديتها في الرحلة كلها, اسهل حتى من دخولي قطر! الشي الوحيد اللي اخرني ان جدامي تور قروب المان دشوا قبلي وعطلوني, وكانوا بشوشين ومهتمين في مجالي ويسألوني وايد عن الدراجة ماعدا واحد منهم كان جدا وقح في اسلوبه وتعامله! كنت واقف في مبنى الجوازات واتعبث في اوراقي وماكنت منتبه اني ساد المخرج بوقفتي وانتظاري, ولا الاحظ حرارة شخص قاعد يخزني من على جنب, لقيت هالالماني بكرشنه واقف ويطالعني في ويهي! ان يعني وخر! انا بكل ادب اعتذرت وتحركت, ولا يهز راسه ان مب عاجبه! تعال يالحبيب شفيك الحين؟ صوتت عليه قلت له شفيك؟ وطنشني! خلصت الجوازات والجمارك ودخلت ناميبيا وكملت الرايد مع يوبي حتى وصلنا محمية اسمها مودومو, وقفنا الدراجات في مكان في الصحرا وعليه تأمين ومغلق وبعدين سيارات جيب خذتنا الى داخل المحمية اللي نمنا فيها. المحمية تطل على النهر وفي الضفة الثانية بوتسوانا يعني قريبة وايد, وكنت اشوف بعض الفيلة والخرتيت وتمساح واحد اسمع عنه بس ماشفته. انا ويوبي نمنا في غرفة وحدة والغرف موزعة في انحاء المحمية وبالليل ممنوع نتحرك بدون حرس من المحمية معاهم كشافات كبيرة لأن ممكن نتعرض لهجوم من الفيلة او الاسود او حتى الفهود اللي تنشط هناك. المنطقة مافيها كهراء الا بالمولد والكهربا فيها ضعيفة وايد والانترنت بالاقمار الصناعية ضعيف جدا. شي حلو الواحد يبتعد شوي عن السوشال ميديا. المكان مملوك لسيدة ناميبية وزوجها وهم من العرق الابيض يتكلمون اللغة الالمانية بينهم وبين بعض بس هم مب المان او من اصول المانية من 6 اجيال انتقلوا الى ناميبيا. كانوا بشوشين وايد وطيبين وسهروا معانا. ليلتها رقدت مثل الميت, ويوبي قام الساعة 3 على صوت حركة وطقطقة مخيفة ولما طل من دريشة الحمام شاف فيل كبير يحك ظهرة في المبنى عندنا! انا ماحسيت بشي وثاني يوم قال لي كنت اشخر ولا حسيت بشي! خسارة فاتتني اللحظة.

كل مانتعمق في جنوب ناميبيا في السفر تزيد الطرق تحديات ووعورة, خصوصا في المنطقة مابعد محمية ايتوشا الطبيعية واللي قعدت فيها ليلتين من اجل ندخل المحمية ونشوف حيوانات زيادة. الطريق الى هذه المحمية كان طويل جدا حار جدا وممل جدا ماعدا في جزء ممتع وهو طريق رملي الى صخرة او نيزك عملاق عمره 80 الف سنة غيرت المسار علشان اروح اشوفه وبصراحة لما شفته انصدمت من صغر حجمه لاني توقعت صخرة في حجم مبنى ولكنها صخرة صغيرة بالرغم من ثقلها اكثر من 70 طن. انا بالنسبة لي الطريق للوصول لها كان ممتع اكثر من الصخرة بكبرها. وصلت بعدها الى ايتوشا وهي منطقة سياحية بحتة مليانة اجانب وسكنت في فندق كبير فيه غرف حلوة وواي فاي قوي جدا وبوفيه لذيذ وايد. اول يوم ماكان في شي وايد اسويه غير غسيل الملابس وتنزيل الصور والفيديوهات. ثاني يوم الظهر طلعنا محمية ايتوشا وكانت الطلعة كلها 4 ساعات. انا لما سمعت 4 ساعات بغيت أهون, الرحلة كلها مانشوف الا حيوانات هالمرة 4 ساعات في هالجيب يخضخض فيني علشان اشوف فيل او أسد يتمغط او زرافة تشرب ماي؟ قلت يالله بروح وبصور معاهم وبصراحة كانت الرحلة ممتعة لأن الحيوانات كانت قريبة جدا وكنا نصور والوقت مر بسرعة. الشي الجميل ان اول مرة اشوف وحيد القرن في محمية. وتمينا ننطره اكثر من ساعة بس علشان يتلتفت لنا ونصوره. الاجانب ممكن يقعدون 5 ساعات انتظار علشان بس صورة وحدة لحيوان. انا يمكن كنت الاقل اهتماما في هذا الشي مع اني اعشق الحيوانات. الطريق كله غبار ورمل وايد وحسيت نفسي كلي متوصخ. احلى لحظة كانت لما صورت الزرافة مع الغروب وكأن الزرافة كانت تمشي علشان تبوس الشمس. توقيت حلو مثل ماتشوفون في الصورة.

بعدها قضينا يومين في الارضيات الحجرية والرملية الصعبة قيادة الدراجة عليها كانت نوعا ما صعبية ومليانة تحديات. اتجهت الى جبل ايتجو وهي منطقة نائية جدا بعد داخل محمية ثانية نمت ليلة فيها وفي هالمحمية شفت الفيلة ووحيد القرن جدامي بيني وبينهم امتار قليلة. الطريق للمحمية كان وعر ورملي وكنت مع يوبي. تمينا نوثق وايد ونصور بعض فيديو وصور وايد حتى وصلنا. درجة الحرارة كانت 36 وكنا هلكانين من السواقة السريعة في الرمل وثاني يوم انطلقنا الى سواكابموند وهذه مستعمرة المانية كل شي فيها يدل انها المانيا بس على شكل مختلف. مطاعم قهاوي موسيقى وحتى اشكال الناس. المدينة هذه تطل على المحيط, ويومها كانت سواقة وعرة بعد بس كنا مسرعين وايد والحرارة 36 حتى فجأة بديت اشم ريحة اعرفها, هذه الريحة تقرب وتزيد, نعم هذه ريحة المحيط, والمحيط الاطلسي له ريحة مميزة, وفجأة درجة الحرارة هبطت من 36 حتى 17 وكان هبوط سريع بل الاسرع في حياتي, حتى الارضية تغيرت وصارت من رملية صفراء الى مسطحات ملحية على طينية جميلة جدا. سواكبموند مدينة ساحلية بس بالليل مهجورة كأنها مدينة سايلنت هيل! لما اجتمعنا مع كيفن اشر علي وعلى يوبي وقال انتوا وايد مسرعين وممكن تموتون. مهما كنتوا محترفين انتوا ماتفهمون ارضية افريقيا. انا قلت بخفف السرعة خصوصا اني وعدت امي ونوف بنتي اني برجع لهم قريب.

بعد سواكوبموند كان من اكثر الايام تحديات وصعوبة, كان 100% رملي وعميق صعب جدا غير الحرارة والغبار اللي ينبعث من السيارات القادمة من الجهة المعاكسة لمدة 366 كم. كنا شوي ابطأ من الايام اللي قبل ولكن كنا انا ويوبي ثاني اشخاص يوصلون وكان فندق لودج جميل في وسط الصحراء وحيوانات المها تلعب حوالين الغرف, وكان المكان طبيعي جدا الى حد انك ممكن تقول هذه الصحراء عبارة عن جنة؟ قعدنا ليلتين فيها علشان ثاني يوم الفجر نروح نشوف اقدم صحرا في العالم. صحرا سوسسفلاي واخدود سيسريم. وفطرنا تحت شجرة عمرها 1500 سنة, هذه الشجرة لو لها صوت ياترى شنو القصص اللي ممكن تقولها؟ من حجمها تكبر وترتفع وتنزل في الارض وتنمو مجددا. في هذا اليوم انجليكا كانت صامته التزمت مساحتها الخاصة وحسيتعا تعبانة ونفسيتها مب شي. كنت اتمنى انها بخير.

بعد الراحة في هاليومين في وسط الصحرا العجوز. جينا لاصعب يوم في الرحلة كلها والاوعر اطلاقا. القيادة في وسط الصحرا والرمال العميقة متجهين شمال حتى وصلنا منطقة اسمها اوس. يعني برا بالالماني وفندق اسمه بانهوف هوتيل. كلنا وصلنا وكنا نحاتي انجليكا اللي ماوصلت حتى الليل مع انها خذت الطريق السهل الاسفلتي ولكن للاسف سمعنا انها سوت حادث كبير على الجسر وكسرت رجلها وكتفها. كنت حاس انها مب اوكي من اليوم اللي قبله, حتى سألتها وقالت انا وايد خايفة.

اما اخر يوم سواقة في ناميبيا خذنا طريق رملي اخر مليان تحديات الى اي ايس جنب نهر اورانج رفير على حدود جنوب افريقيا طول اليوم ورحنا عقب اخدود نهر الاسماك الكبير في افريقيا واخر شي نزلنا في فندق عبارة عن هانقر كبير وستايل روت 66 في امريكا. اخيرا اقدر اقول ان ناميبيا هي افضل جزء من رحلة قلب الكوكب.

سيلفي مع الاخدود

سيلفي مع الاخدود

اخدود نهر الأسماك في ناميبيا

سيلفي مع الفيلة في مونت ايتجو