المسار الأخضر, مسار الحدائق

الطريق مب وايد طويل اليوم, هانت! بس طريق متعرج وايد طلعات ونزلات ولفات يمين ويساربعد كم ساعة طلعت طلعة على الجبل ولقيت منظر حلو من على معبر جبلي وصفيت الدراجة طلعت موبايلي علشان اصور, بس تعديت الحاجز علشان اصور الوادي من ورا الأشجار وفجأة طلع واحد شايب لهجته غريبة اول شي افتكرته دنماركي وكان نفسه ثقيل اول ماشافني قال: شي ممتع ومثير صح؟ انا جاوبته: اي وايد علشان جذي وقفت اصور قام اشر على اعلام كينيا وجنوب افريقيا اللي على تيشيرتي وقال: انا اقصد الرحلة اللي تسويها. قلت له: اي هذه مدتها 7 اسابيع وانا الحين في آخر الأيام قاعد اسوي مسار الحدائق. وتكلمت أكثر عن اللي سويته قبل سنة ورحلاتي كلها وانبهر وايد, سألني من وين انت يا ولدي؟ قلت له من قطر (وكنت مستعد اشرح وين قطر) تفاجأت رد سألني: قطر؟ (بلهجة عربية صحيحة) قلت اي سيدي! قام ضحك وقال يعني احنا اصدقاء؟ انا على طول فهمت هو من وين وقلت له: اسرائيل؟ ضحك وايد وطبطب على كتفي وقال: شفت شلون احنا بشر واصدقاء بعيد عن الحدود السياسية والساسيين ورجال الدين؟ في الآخر احنا بشر ونحب السلام, بعدين تمنى لي التوفيق في باقي رحلتي وراح عني. الرايد اللي خذته عقب هالحوار خلاني أفكر وايد ان فعلا شلون احنا بشر بعيد عن السياسة والتشدد الديني والتعصب, كلمة بشر وانسان تموا يرنون في راسي طول الطريق! بشر بشر بشر بشر! هذا الشي ذكرني في حوار شديد صار بين كيفن ويوبي, لأن يوبي من سنين حاشرنا انه هو مجرد انسان وماينتمي لأي بلد كونه فرنسي الأصل عاش وانولد في ساحل العاج وانتقل فرنسا وعقب هاجر امريكا ولا ينمتي الى اي عرق دين او بلد! لحظة شوي! ترى انا بعد كنت اقول انا مجرد انسان مانتمي الا الى انسانيتي! بس في هذيك الليلة كيفن قال كلام مهم جدا, الحوار كان لما يوبي تكلم عن انسانيته وانه مايهمه اي بلد ينمتي له, كفن عصب وايد وقال له انت عايش في احلام وشعارات مالها معنى فالواقع صنفنا كبشر مختلفين واعلام ودول وطبقات واديان والعالم مايعترف الا انت شنو جنسيتك وانت شنو طبقتك وكم عندك! انا بريطاني لو اي حد بيتكلم عن الملكة باخذه وبكرفس ويهه (قالها بمعنى آخر بس اترجمها لكم بمفهومي) واي حد يهين علم بريطانيا ممكن اذبحه ولو انجلترا تلعب رجبي اشجع بكل وطنية! انت قاعد هني تتفلسف علينا بانسانيتك على واقع غير موجود فانت لازم تلقى لك انتماء! عقب التف علي وقال: انت ياخالد تنتمي لقطر ولا المانيا ولا شنو انتمائك؟ انا قلت له كيفن انت تعرفني دايما شايل معاي علم قطر وفي كل نهاية رحلة ارفع العلم واعتبر اللي سويته يرمز لبلادي مهما بعدت عنها! قال صح عدل شغلك والتفت على يوبي وقال: سمعت؟ كان حوار طويل بيتحول هوشة كبيرة لولا ان يوبي عرف شلون يهديه, خل ارجع ابدا من البداية عن مسار الحدائق.

أخيرا.. بعد 5 ايام كسل ودلع في كيب تاون قررنا نتحرك ونبدأ مسار الحدائق واللي عبارة عن 12 يوم لفة على المناطق المحيطة بكيب تاون! الكل يمدح هالمسار ويعتبره شي خيالي وهي مثل ما قال كيفن اجازة أكثر من انها مغامرة! ماعدا يوم واحد منها وهو (الطريق الى الجحيم). في هال5 ايام اللي قعدتهم في كيب تاون ماسويت ولا شي ولا قمت من السرير الا بس روحتي للوكالة علشان سيرفس للدراجة ورحت المول اطبع تي شيرت حق عيد ميلاد كيفن. كانت الطلعة الاولى تاريخ 11 اكتوبر والمفترض نتحرك الساعة 9 الصبح بالضبط, وعلى 9 الا ربع الكل جاهز ولابس الخوذة والعدة ومستعد للانطلاق في قروب (لأن كيفن يحب دايما بداية ونهاية كل رحلة يقودها تكون في قروب) ولكن صارت الساعة 9 والاخت حبيبة انتوان للحين مانزلت, بعد كم دقيقة نازلة تتمخطر وهي مبتسمة وشايلة شنطتها ولابسة بنطلون جينز وجاكيت جلد وكعب بوت عالي! ماتتصورون شلون كان شكل كيفن لما شاف هالمنظر! بس انطلقنا وانتوان من آخر واحد فجأة صار اول واحد لأن اذبحه ولا تخليه في الآخر! عند الانطلاقة كنا تقريبا 9 دراجات, منها ناس من البداية مثلي ومنها ناس انضموا لرحلة مسار الحدائق بس. اول منطقة المفروض نوقف فيها هي مدينة روبرتسون, والطريق لها يتخلله طرق اسفلتية وبعض الطرق الحجرية, ولكن اخترت اخذ الطرق الاسفلتية واتجنب الرملية مع اني ممتاز في القيادة في الطرق الحجرية والرملية ولكن لأن لما كنت في كيب تاون صادتني حالة أرق وقلة نوم لفترات طويلة لدرجة اني ماقدرت انام يومين. شكرا لفيري على اقتراح قطرات سي بي دي اللي خلاني انام 7 ساعات متواصلة ليلتها! وصلت روبرتسون وهي مدينة عادية مافيها اي شي الا كم من مطعم ولما مشيت في الحي لقيت كم محل عربي, مثل محل رياضة ومحل جوالات فيه عرب وشكلهم يمنيين من ملامحهم وكلامهم. ثاني يوم كملنا على برنس البرت وهذه المدينة المهجورة كأنها مدينة اشباح قعدنا فيها ليلتين لأن ثاني يوم من برنس البرت كان مسارنا الى الطريق الى الجحيم! بصراحة ماكنت متأكد اذا بسوي طريق الجحيم ولا لا بسبب الارهاق اللي مريت فيه بس الكل متوقع اني اسويه كوني ممتاز في هذه الطرق, عموما هذا الطريق اختياري مب لازم اسويه وبامكاني اقضيها على البركة حتى المغرب! ولكن بقرر حتى الليل. عموما اصلا الطريق الى برنس البرت ترى ماكان سهل بعد, واكانت مسارات صخرية وعرة وملتوية ورمل وكل شي حتى لما دخلت هذا الطرق كان يوبي وراي وعقب شوي لما لاحظنا الطريق مب سهل (مب السهولة اللي كيفن صورها لنا) ترددنا ووقفنا شوي! وبعدين انا كملت حتى اختفى أثر يوبي وانا وقفت مرة ثاية اشوف الخارطة وتأكدت ان هذا الطريق الصح حتى كملت لين طريق يا اخذ سيده ولا يسار! هني وقفت حتى جوليا فجأة طلعت وتمينا في مناظرة هي تقول سيده وانا اقول يسار حتى هي اقتنعت ان يسار, وكملنا وبدت صعوبة الطريق تزيد والسيارات المارة تشكل خطورة اصعب بعد, حتى آخر شي وصلت معبر جبلي وكنت اول واحد وبعد دقيقتين الكل وصل حتى يوبي كان معاهم! قعدنا شوي وصورنا كم صورة وعقب تحركت انا لأن ماكان باقي وايد على الوصول الى برنس البيرت فقلت خل انطلق شوي في الحصى بسرعة أكبر شوي واتفنن, ولكن لاحظت وراي دراجة قاعدة تحاول تحدني وتبي توصل لي وانا طبيعتي ماحب حد يكون قريب وراي او يحدني خصوصا في الاوف رود! فماكنت متأكد من هذا اللي يبي يحدني, اكيد يا تيم او انتوان! انتوان دايما يبي يكون الاول, عاد عرفت عقب ان تيم اللي كان يحدني ومرته وراه في الدراجة! مب صاحي! حتى الطريق ماكان سهل وشاحت علي الدراجة كم مرة وعدت على خير! عموما وصلت المسكن وخذت دش دافي وريحت ونمت وانا افكر اروح بكرة طريق الجحيم او لا؟

قمت ثاني يوم الصباح في قمة الطاقة والحيوية ومستعد للطريق الى الجحيم ولابس العدة والقفازات ونازل افطر! رحت اشيل الصناديق من الدراجة علشان تصير أخف, طبعا 2 من اللي كانوا بيروحون هونوا منهم ايد وزميله, في المقابل جوليا قررت تجي وتقود هذه المغامرة! فاللي بيروح الحين يمكن 5 او6 دراجات بس. الشي الجميل ان جوليا قررت تجي مع انها قبل قالت مب رايحة! فانطلقنا كلنا مع بعض متجهين لهالوادي اللعين وقبل الدخول له لقيت علامة تحذير ومكتوب عليها: طريق خطر جدا لل48 كيلو القادمة انت مسؤول نفسك من هذه النقطة! واحنا كنا متفقين ان مانوقف عند هذه العلامة ولا نصور عندها الا بعد انتهاء النزول والطلوع من هالوادي, وبداية الطريق كانت صخرية وعرة جدا ورملية وخليط من كل شي حتى وصلت الى عبور جدول مياه كان وراي وحدة اسمها آن وعقب ماعبرت شفتها اختفت هي وستيف اللي وراها! قلت ياربي ليكون انقلبت هذه في الماي ولا ستيف صار له شي! عاد المشكلة انا في مرحلة ووضع اني ماقدر اوقف ولا ارجع لأن الطريق منحدر صخري وضيق جدا. فكملت طريقي والوعورة شوي قلت عن البداية ولكن تفاجأت بعبور جدول مائي اكبر من اللي قبله ولكنه اقل عمق, عديته على خير ووصلت الى الجزء الأخير لقيت جوليا وقلت لها اني لاحظت آن وستيف وقفوا عقب عبور الماي, هي طبعا ماتقدر ترجع بسبب الوعورة فكملنا حتى اسفل الوادي والجزء الأخير كان الأشد وعورة وفي الاخر وصلت اسفل الوادي وكانت مزرعة تشتغل فيها عجوز بيضا كأنها عايشة بنفسها هناك وتمينا لحد ما وصل ستيف وآن كانت في الفان بسبب العطل لأنها هي اللي طاحت في الماي وتعثرت والدراجة بطلت تشتغل! شربنا شي بارد وقعدنا حول الساعة وعقب قررنا نطلع نفس الطريق والطلوع ما كان أسهل من النزول غير اني عارف شنو بيواجهني في الطلوع ولكن الاصعب في الطلوع ان لو جات سيارة من الجهة الثانية مستحيل اقدر اوقف وهي مستحيل ترجع فالله يستر! وصار موقف ضحكني وفي نفس الوقت حقير ومخيف الا وهو وانا في احد المنعطفات الرملية تعثر عندي التاير الخلفي وعلق في الرمل والحصى العميق الناعم وكانت الدراجة بتهوى فيني من المنحدر فتم التاير عالق وتميت احاول اطلع الدراجة وفي الجهة المقابلة في سيارة بيضا بيك اب اللي يسوقها واحد ابيض, عطيته نظرة “تعال ساعدني” ولكن الحبيب في المقابل طلع كاميرته وتم في وضعية الاستعداد اذا طحت يكون صورني وانا أموت! هالشي عطاني دافع اني اطلع واروح صوبه واصوبع له! في الاخر تمكنا من انهاء الطريق الى الجحيم ووصلنا عند العلامة الخطرة وهالمرة وقفنا وصورنا عندها ابتهاجا بالنصر! ووصلت الفندق وكالعادة تسبحت في ملابسي وغسلتهم كلهم وعلقتهم ورحنا نتعشى ولكن كل المطاعم تسكر 9 في الليل وتتحول مدينة اشباح!

يوم جديد مليان طاقة الى منطقة اسمها اودتشورن فيها خيارين يا اطلع طريق حصى او طريق معبد بالاسفلت طبعا خلني اكافىء نفسي عقب طريق الجحيم واخذ المعبد فطلعت على راحتي معي يوبي اللي اختار نفس الطريق. كان يوم قصير والقرية اللي بروحها مشهورة بمزارع النعام وهذا اليوم هو عيد ميلاد كيفن يعني بتكون بالليل حفلة كبيرة خصوصا ان احنا بس اللي ساكنين في هالمسكن! في الطريق وقفنا عند منطقة شلالات اسمها دي رست, نزلنا انا ويوبي ومرته فيكتوريا مشينا شوي وحوالينا ناس لابسين تيشرتات مكتوب عليها القوة الجوية- الفرقة الموسيقية الرئيسية, وكانوا حدهم مبسوطين, ولما ركبنا منطقة الشلال هم اصعدوا على اعلى صخرة وتموا ينشدون ويغنون والصوت كان شجي ماتتصورون شلون خصوصا وحدة منهم صوتها مال اوبرا! تميت واقف عندها اصور وحاط المايك عندها علشان اسجل صوتها وكنت طول الوقت اصور وفي نفس الوثت يوبي يصور ومرته, ولاحظت يوبي ملامحه التأثر بل ان فيكتوريا زوجته بدت تصيح من شدة التأثر بمدى سعادة هالفريق الرائع اللي يغني بكل حماس وصدى الصوت كان قوي جدا واصل لين تحت لدرجة ان كيفن سمعه اللي كان قاعد تحت, لذلك سميتها انا: الاغنية الساقطة من الاعلى, لأني حسيتها تمشي مع سيل الماي وسقوطه مع الشلال, قشعريرة جميلة وبرودة حلوة مع رذاذ الماي واصواتهم اللي بعشوائية صنعت انسجام وتوليفة كأنها حفلة اوبرا كل جزء من هذا الشلال عضو فيها بالتنسيق بينهم وبين بعض. يوم من اروع ايام الرحلة. وكملت الطريق بعدها مع يوبي ووصلت المنطقة غسلت ملابسي وانتظرت حتى الساعة 6 وكيفن والشله كلها قرروا يقعدون في الجلسة خارج غرفتي ويشربون ويسولفون ومنها قرروا يسوون الاجتماع اليومي وهدايا عيد ميلاد كيفن عند باب غرفتي لأنه اشرح مكان يطل على الحديقة. عقبها تعشينا ستيك لحم النعام وكان لذيذ جدا مع اني قبل في كينيا جربت كفتة النعام بس الستيك كان الذ بوايد وعقب انسحبت من عندهم بهدوء علشان اروح انام وبعدها بربع ساعة كلهم تجمعوا عند غرفتي وتموا يكملون شرب ومو بس جذي! الا قعدوني من النوم وتموا يصوتون: الامير خالد! طلعت لهم من الشباك بدون ملابس ومولع كشاف الموبايل عليهم: انتوا من صجكم؟ قمت لبست وطلعت لهم كملت السهرة معاهم لين صار الخلاف بين كيفن ويوبي عن الهوية والانتماء اللي ذكرتي في بداية حديثي! وعقب ماتصالحوا تمينا نلعب رجبي في اخر الليل والكل صحى على صراخنا بس راح كل واحد غرفته وقررنا ننام! أخيرا!

وفي هذا اليوم الاخر قررت اسوق بنفسي وحبيت اكون مع نفسي مع ان الطريق جدا معقد! معظمه على شارع رئيسي اسمه ن2! وننقل من بين هذا الشارع الى الشارع الموازي له يمكن 4 مرات! كنت متجه الى اددو وهي محمية طبيعية مليانة فيلة وبننام فيها ليلتين مع اني مب مهتم اشوف الفيلة لأني شفت وايد اثناء هذه الرحلة فقررت لما اوصل ماروح ثاني يوم واريح في الفندق. قعدت ثاني يوم كله في السرير اسوي ولا شي! وهذا كان اجمل شي في هالليلتين! بما ان اليوم كان طويل جدا حسيت نفسي طول اليوم اني بكون آخر واحد يوصل, غير اني ضعت وايد وانتهى فيني المطاف بس على ال ن2 ولكن لما وصلت قلت الحين الكل قاعد بالشورت جدام المسبح بيشوفوني داش عليهم عرقي يتصبب بملابس الدراجة وكل واحد بيعلق ها وينك ووين رحت وماشفناك اليوم, لكن, تفاجأت اني كنت اول واحد يوصل, قلت لا لا اكيد في شي مب طبيعي معاي, معناته ان الطريق والانتقال من ال ن2 حتى الطريق الموازي فوق ال5 مرات فيه اشياء ممتعة فاتتني, ماعاد يهمني بصراحة, لا الطريق الموازي من اهتمامي ولا محمية الفيلة, خلني اروح المسكن واريح هاليومين!

 

 

محمية ماونت كامبيدو هذه كانت النقطة اللي بعد, الاستعداد لها كان مختلف لأنها محمية شديدة الحماية بل ان الوصول لها اصعب من الوصول الى قاعدة عسكرية او منصة نفطية, غير ان اليوم كان طويل حده, الا ان كيفن طلب من الجميع الالتقاء في احد الكافيهات للقيادة في قروب لأن المحمية فيها فوق ال11 بوابة وسياج كهربائي ولازم ينفتحون مرة وحدة لمرور الجميع في وقت واحد, وفوق هذا كله اخر 27 كيلو كان طريق رملي حجري صعب جدا بس من حسن الحظ ان الجو كان جاف ولا لو نزل مطر كان بيصير ملعب صابوني ولا حد بيقدر يسوق على الطريق اللي كأنه فخار مطحون! وصلنا تقريبا الساعة 1 الظهر والمكان كان فعلا معزول وكأنه جنة شانغريلا الضائعة, في وسط صحراء وغابات قاحلة فجأة تلقى هالقصر الجميل الي ذكرني في حلقة سندباد لما صحوا الصبح لقوا قصر كبير يطلع مرة كل 100 سنة! وفوق هذا القصر هذا فيه واي فاي ممتاز على غير عادة افريقيا. بلغوني ان بعد ساعة في افترنون تي او شاي العصر مع كيك وانا توقعت كالعادة كيكة محذوفة وغوري قهوة او ترمس شاي ولكن لا! طلع اكل كامل واسياخ لحم صغيرة وقطع دجاج مقلي وساندويتشات وبالاضافة الى الكيك عصير ليمون والكثير من المشاريب. من الجوع صرت مفجوع وتميت اكل حتى انترس بطني, خذت لي عصير ليمون مع ثلج ورحت طبيت في المسبح بنفسي, وحوالي الكثير من القرود يناقزون يمين ويسار حتى تذكرت ان الساعة 3 ونص بنطلع رحلة سفاري قمت بسرعة سبحت ونقزت في الجيب مع الكل, حطيت في بالي اذا مارحت هالسفاري بتم قاعد ماسوي شي في الفندق فمن الافضل اطلع معاهم. كانت الطلعة تقريبا 4 ساعات وشي, يعني لازم نحط في الحسبان ان ممكن نتم ساعتين او 3 نراقب خرتيت واحد ولا اسد واحد! وهذا تقريبا اللي صار, اول ماطلعنا لقينا فهد او شيتا جدامنا تمينا نتلفت على بعض لأن الفهد يتمشى في المكان اللي كنا مرينا عليه بالدراجة وتمينا تقريبا 20 دقيقة نراقب فيه وعقب تمينا نلف ونشوف سلاحف وايد وزرافات وكم من ثعلب حتى لقينا جلالة الملك! ملك الغابة الاسد اللي طلع لنا قبل انا ورفيجي على الدراجة وخرعنا لحتى قدرنا نفلت منه. القعدة مع الأسد استهلكت معظم الوقت, حتى صار ظلام طلعنا فوق في تلة اوهضبة كبيرة ونزلنا والسواقين سووا شكل بارولحم مقدد ومكسرات والكثير من المشاريب اللي الشلة استانسوا عليها حتى صارت الساعة 7 وظلام تام, رجعنا نزلنا نفس الطريق وقبل القصر بشوي شفنا زرافة في وسط الظلام وكان المنظر جميل جدا مع ان شفت زرافات وايد قبل بس المنظر كان جميل جدا, حسيت ولو لمرة ان الزرافة متطمنة غير عن كل باقي المرات. وصلنا السكن ومن السيارة الى العشا وكان ظلام ومشاوي, من التعب كلت بسرعة ورحت نمت! خذت قطرة البي سي دي ونمت على طول. ولأول مرة في الرحلة قدرت انام 8 ساعات متواصلة!

بما ان اللفة حوالين المحمية قبل المغرب نزل مطر شوي على فترات متفاوتة, هالشي وايد اقلقنا جميعا ان اليوم الثاني بيكون (زحلاقي) بالطين وبيكون في منتهى الصعوبة الخروج منها, ولكن من حسن الحظ كان افضل حتى من اليوم اللي قبله, فطلعنا مرة ثانية البوابات المكهربة وكانت الارضية يابسة وبدون غبار بسبب الامطار اللي نومت الغبار, طريقنا في هذا اليوم الى وايلدرنس الساحلية اللي قضينا فيها ليلتين. يافرحة كيفن لأن فريق انجلترا بتلعب كاس العالم في الرجبي وبيكون يوم اجازة وبنقضي الصباح كله نشوف مباريات رجبي. انا طبيعتي ماحب الرجبي ولا اي رياضة جماعية بس بشكل ما بديت صرت احب اشوف مباريات الرجبي وصرت اتولع فيها وبعد الراحة الجميلة طلعت منطقة ارنستون الساحلية اللي كنت فيها قبل اسبوعين ونص ووصلت اول واحد بعد وعلى طول رحت المطعم اشوف مباراة جنوب افريقيا. شي حلو طريقة تشجيع الجنوب افريقيين الحماسية, الكل لابس التيشيرت الاخضر ويصارخ ويشجع بكل حماس وطبعا هم فازوا! واليوم اللي بعده رجعنا الى ستيلين بوش اللي عباره عن مزارع واين, منها زيارة لمزرعة واين علشان نلعب على سكوترات السيقواي! هذه المرة كانت ليلة وحدة انطلقنا منها الى كيب تاون حتى نوصل الى اليوم الأخير!

بديت هذا الصباح الجميل واللي حسيته كأنه يوم العيد في قطر, برودة خفيفة ممتدة من المحيط وغيوم منتشرة, فعلا احساس يوم عيد وكالعادة ماكنت مستوعب ان هذا ترى آخر يوم, خذت الطريق الساحلي معظم اليوم واستمتعت في الشواطيء الجميلة في آخر اميال الرحلة حتى وصلت الفندق نزلت أغراضي, ولكن الحين لازم اخذ الدراجة الى شركة الشحن! في هذه اللحظات بديت احس بموضوع الوداع واللحظات الأخيرة واستوعبت اني راح انهي الرحلة الحين. حطيت الموبايل على السكان وشغلت أغاني وانا متجه الى الشحن. في آخر كم كيلو شغلت برنس وفتحت الكاميرا, وصلت الشركة وبديت أحمل الاغراض من الدراجة وافرغها في كيس بلاستيك اعطاني اياه موظف الشركة. هني بدا هذا الحوار مع الدراجة:

الدراجة: خلاص هذا كل شي؟ بتروح مرة ثانية؟

انا: للاسف لازم اروح ولي رجعة ثانية

الدراجة: بس هالمرة وايد اقصر ترى تقدر تسوي اكثر من جذي بوايد؟

انا: نعم اقدر ويحزنني انهاء الرحلة اليوم ولكن كل شي له وقته والحن وقتي ووقت اسرتي, برجع مرة ثانية ويمكن نروح نورد كاب

نعم, كانت لحظات مؤثرة وحزينة في كل نهاية للرحلة وفي نفس الوقت سعيدة جدا, مشاعر مختلطة ماعرف شلون اوصفها في كلمات بس ماعتقد اي حد غيري ممكن يحس فيها. بما اني كل يوم اسوي اغراضي واشيلها ولكن هذه المرة غير, اغراضي بسويها لاني بروح لفترة اطول, ماعرف شنو القادم ولكن اعرف اني مشتاق لبناتي وامي وابوي. دايما اقول ان ماقدر القى لي وطن ولكن الوطن هو وين عيالي عايشين في امان, نايمين في هدوء, هي اللحظة اللي ادخل فيها نص الليل القاهم نايمين في هدوء اعدل فراشهم ابوسهم اخذ نظرة على ارجاء الغرفة واطلع.

وصلت الفندق بدلت ورحت شريت قميص مانديلا علشان احتفل فيه آخر ليلة وتعشيت مع كيفن والجميع وانسحبت كالعادة في هدوء وطلعت نمت علشان يوم المغادرة. مسار الحدائق انتهى والرحلة وصلت للنهاية. اشوفكم في رحلة جديدة. مشتاق للوطن