كالعادة, يوبي يبي يكون اول واحد يطلع كل صبح واليوم عبور اخر حدود في الرحلة وهي الى جنوب افريقيا! متحمسين على الاخر كنا والمفروض نطلع الساعة 9:30 الصبح بس يوبي مشتط طلع الساعة 9! مب مشكلة بتبعه كالعادة. طلعنا وكان الطريق رملي حتى الوصول الى اخر تقاطع وبعدها يبدا الاسفلت. يومها كنت مرهق من الليلة اللي قبلها وقررت اتبع اثر التواير حق يوبي اللي جدامي تقريبا ب2-3 كيلومتر, وفجأة قلت يه! انا فيني النوم صج ولا اثر التواير حق يوبي بدا يكبر ويصير في حجم اثر تاير السيارة؟ ولكن استمريت في تتبعه حتى يوبي قرر يوقف! شنو تتوقعون صاير؟ تراه مبنشر وطاير بالدراجة الحبيب ومايدري انه مبنشر ومستمتع بس كانت الدراجة تشوح يمين ويسار لدرجة انه فكر انه مهاراته هو مختلفة بسبب السهرة الليلة اللي قبل؟! المهم الحين احنا متوهقين! مافي خدمات والفان قاعدين ننطره ساعة كاملة وورانا عبور حدود, يوبي لمس التاير وكان مولع حده كأنه مطلعينه من الفرن! والظاهر كان يسوقه مبنشر من طلعنا من الفندق وهو مايدري. اخر شي وصل بول ولقينا البنشر وتصلح التاير وكملنا طريقنا بعدين لاحظت التاير ينقز ويوبي يسوق دراجته كأنه فيه دمله او مطعوج بس قلت يمكن لون التاير فيه شوي ماي وغبار لين وقف هو وسألني: تحس التاير عوي ولا الارضية مب عدلة؟ اكتشفنا انتفاخ كبير على جنب التاير معناه ان التاير اخترب من القيادة الطويلة في الحصى. قلت له خلك هني انا بلحق الفان وبناديه لك.وطلعت طيران على الخط سرعتي وصلت 195 لين صدته عقب المحطة بشوي. خبرته ونطرتهم في المحطة. ويوبي حط دراجته في الفان لان التاير اخترب. ورحنا نعبر الى جنوب افريقيا.
يوبي حزين ان دراجته الكي تي ام ماوصلت جنوب افريقيا
يوبي استغل البنشر وقعد يصور باقي الربع اللي على الطريق
لما قررت اخلي يوبي يصورني وصل بول وخرب الصورة
عبرنا الى جنوب افريقيا وكان مركز حدودي حضاري نوعا ما مقارنة بباقي المراكز اللي مريتها, قطعت تقريبا 15 كيلو في ارض محايدة لاتتبع احد بين ناميبيا وجنوب افريقيا وكان طريق سهل وممل مافي شي حتى وصلت مدينة اسمها ابنغتون مافيها شي مميز اطلاقا غير ان الغرفة كانت سويت كبير وقريبة من دراجتي. ثاني يوم طلعت الى كلانويليلامز وهذه كانت اول مستعمرة في جنوب افريقيا بعد تعتبر قرية صغيرة جدا مافيها اي شي غير بار واحد ومطعم واحد. كان يوم ممل بطيء آخر ومافي شي يذكر وكلنا نتطلع الى ثالث يوم وهو ستيلينبوش. في ستيلينبوش كنت عارف هالمدينة الصغيرة فيها كل مزارع الواين والربع كلهم مشتطين يبون يزورون هالمزارع وانا طبعا اخر اهتماماتي وفعلا مارحت وتميت مع يوبي في الفندق. ويوبي كان يبي يسوي فيديو حق كيفن كشكر على جهوده وتم المسكين طول اليوم يشتغل على هالفيديو حتى لما بول شافه قال لاتسوي شي حق اي حد على حساب نفسك وخربها جانو عقب لما قال له: اللي تسويه شي غبي! قام يوبي وسكر اللابتوب وكنسل كل شي! لعدها طلعت اتمشى في ارجاء المدينة بنفسي, المدينة عبارة عن مكان كله بيض وسيارات فارهة وقهاوي ومطاعم وكل شوي سيارة فيراري او مرسيدس مارة, يعني تحس انك في اوروبا او في مدينة جنوب فرنسا! فعلا هذا كان احساسي. اخر الليل قعدت مع 2 جنوب افريقيين طباخين وقالوا لي قصص عن الفصل العنصري وشلون معاناتهم وشلون البيض عايشين سعداء في مقابل السود عايشين في خرابة!
حركتي المعتادة الاشارة
بداية مبكرة في هذا اليوم! يوم طويل وطويل جدا! سيده وممل جدا! للوصول للمحيط مرة ثانية او خل نقول نوصل للمحيطين وهذول تلقاهم مع بعض في مكان واحد بس: راس اغولاس! وصلنا في قروب وصورنا مع بعض واحتفلنا مع العلامة الجميلة! الاحساس كان جميل ان نشوف نقطة تجميع المحيطين مع بعض وبعدها كملت طريقي تقريبا 60 كيلو الى منطقة تطل على المحيط نمت ليلة علشان ثاني يوم الوصول الى كيب تاون ونهاية رحلة قلب الكوكب
قمت الصبح قطيت اغراضي في الدراجة وليبب ما كنت منهك ومرهق وايد. دقات قلبي سريعة ماعرف ليش بس اعرف ان هذا ارهاق شديد طلعت الصبح بدري مع يوبي وتوني. اليوم بيكون طويل بس السواقة حلوة. يوم احد جميل سواقة على الساحل طول اليوم والجو كأن شتاء الدوحة مب حر ولا برد وايد. دراجات وايد في الشوارع وعرفت ان يوم الاحد يوم حق الرايدات والطلعات بالذات في الطرق الساحلة والمتعرجة الجميلة هذه! بعض هالدراجات سبورت والبعض الاخر هارلي ولكن الكثير منها ادفنشرية والبعض يسلم والبعض مايسلم, ولكن الاكثرية مهتمين ويبون يعرفون شنو قصتنا مع الرحلة ومن وين بدينا ووين نهايتنا؟ المنظر على الساحل كان اكثر من رائع ولكن للاسف كنت مركز على الشارع طاير ولا يوبي وتوني اللي طايرين على الطرق المتعرجة حتى اخر شي شفنا دراجة كي تي ام منقلبة فجأة الكل خفف سرعته واحترمنا انفسنا! مانبي في اخر يوم نسوي حادث كلش مب حلوة! وكنت وقتها احس بتعب اكثر واكثر ودقات قلبي تزيد وايد لدرجة حسيت ان بيغمى علي! ماكنت عارف هذا من قلبي ولا من الساعة اللي لابسها؟ وكنت متوتر وايد ومتخوف من موضوع دقات قلبي اللي اعتقد وصلت وقتها 150 (على حسب الساعة) لذلك قررت اشيلها وافصخها. عقب عرفت ان كيفن يبي صورة جماعية ثانية في راس الرجاء الصالح! ولين احنا امس شفنا اللي اهم من راس الرجاء الصالح! ليش نرجع له؟ بس لأن الاكثر شهرة لقربه من كيب تاون! بس موضوع الصورة الجماعية مرة ثانية مال امها داعي! كل هذا علشان بروشرهم! في الاخر رحنا وصفينا طابور سيارات طويل ودفعنا 303 راند علشان ندخل. وخذ الزحمة هناك! صورنا وطلعنا من هناك قروب رايد مع بعض! وتصوروا! اطول قروب رايد في حياتي في هالزحمة كل واحد في صوب وكنت ميت تعب وارهاق ابي اوصل الفندق واريح! لا اريح شنو؟ اخو سفير جنوب افريقيا في قطر ناطرني عند الفندق مسوي لي حفل استقبال لحقوق الانسان! احاتي الطريق ولا اللي بيصير في حقوق الانسان!؟ اوكي وصلت الفندق وهذا هو شيراز ناطرني عند الباب معاه واحد ملتحي ولابس ثوب! قلت الله يستر! مالحقت امش عرقي من راسي صفيت الدراجة ركبت معاه, في السيارة تفاجأت يعرف وايد اشياء عني وبحث عني صح في موقعي وفي السوشال ميديا مالي!
اخيرا وصلت الموقع واللي كان عبارة عن مبنى قيد الانشاء وفيه حائط كبير جدا عرفت فيما بعد ان هذا نموذج طبق الاصل من جدار الفصل بين الفلسطينيين واليهود! صورت جنبه والكل استقبلني هناك, نساء وشيوخ واطفال الكل يبي يصور معاي, الكل متدين, ملتحي, محجبات, منقبات, واطفال, وبعدين دخلوني هالمبنى اللي المفروض يكون متحف فلسطين وكان فعلا قيد الانشاء بس حاطين كراسي بلاستيك وطاولة والكل قاعد وشكله مؤتمر صحفي لي! وحطوا المايك في ويهي وقالوا لي تكلم! طبعا تكلمت عن ترحالي ولكن الاسئلة خذت منحى آخر وصارت سياسية وللاسف اجاباتي كانت دبلوماسية لأن دخلوا فلسطين واسرائيل وآرائي كوني مسلم. خلصت المؤتمر قالوا لي بنسوي لك جولة في أرجاء المتحف وطلعت الطابق الاول كان قيد الانشاء تم يشرح ان هذه بتكون المكتبة وهناك مكاتب وطلعت الثاني وكان قيد الانشاء قال هني بيكون المطبخ والاجتماعات ونفس الشي الثالث حتى السابع! ماكنت اشوف الا مبنى قيد الانشاء! وطلعني على الدرج! سألته عندكم مصعد؟ قال اي بس حبيت امشي معاك! يمشي معاي وانا بلبس الدراجة؟ الجوتي بروحه وزنه يمكن 3 كيلو! اخيرا رجعت الفندق وتسبحت بثيابي وكنت ابي انام نومة طويلة! ووصلت وخلصت الرحلة! تصبحون على خير
