احلام وايد في ايام شوي

على سرعة 80 كم حاط دراجتي على الكروز كنترول (مثبت السرعة) احاول اطلع حبة الملاريا اللي لازم اخذها على الوقت دايما. كانت الساعة 8:12 الصبح ومنبه الجوال مب راضي يسكت واللي كنت اسمعه من الدراجة في شنطة التانك. فصخت القفاز وحطيت يدي في شنطة التانك سكرت المنبه وطلعت الحبة اللي كنت لافها في كلينكس, واول مافتحت لفافة الكلينكس وانا اسوق جان تطيح الحبة في شوارع ملاوي! يا سلام! الحين اوقف ولا انتظر لين أوصل اي محطة؟ اذا وقفت الحين بيلتمون علي السكان المحليين وماراح أخذ راحتي, فقررت أروح محطة بترول. اول ماوصلت المحطة التفت على يميني لقيت يهال وايد قاعدين يشوفوني بترقب ومراقبيني بحذر في هدوء, كل ماحطيت يدي في جيبي شافوها بانتباه, نوعا ما اكسروا خاطري, خلصت من البترول وقفت جدام شوي وخذت حبة الملاريا وقعدت افكر شاعطي اليهال؟ تذكرت استكرات خلود فقمت طلعت لي 100 حبة وعطيت ولد واحد, وماهي الا ثواني تقريبا 70 ياهل حوالي هجوم عنيف! كنت مشغل القو برو على اساس اني متوقع انهم بيعفسون الدنيا لدرجة دراجتي كانت بتطيح! صارت فوضى كبيرة والاطفال بدوا بتدافعون وكانت وحدة معاهم مليانة لابسة أحمر تدفع في اليهال بكوعها وكانت اقواهم, اتذكر كان في يدها 5 استكرات! في الاخر طلبت مساعدة مدير المحطة يبعدهم عني

أطفال ملاوي من بعد ماحصلوا الاستكرات

كنت قاعد اقرب من سينغا باي واللي تعتبر مدينة أخرى من المدن والقرى اللي يطلون على بحيرة ملاوي, البحيرة اللي الكثير من شعب ملاوي يعتمدون عليها كمصدر دخل لهم. لدرجة انك دايما تشوف شغل واسواق وصيد واي شي يطلع من هالبحيرة ينباع على السيف. قبل وصولي للمدينة بكم كيلومتر لقيت فوضى كبيرة وناس يرقصون ويراكضون وطقطقة وطبول وناس يصفرون واشوف ناس من الجهة الثانية يركضون صوبهم على شكل فرق مختلفة, مافهمت شصاير بس دشيت بينهم بالدراجة حتى وصلت الفندق اللي فيه شاطيء جميل رملي ذهبي يطل على بحيرة ملاوي من الجنوب. الغرفة كانت اروع من الرائع كونها تطل مباشرة على البحيرة, قضيت ليلة وحدة هناك على اساس ثاني يوم انطلق الى زامبيا. ولكن ثاني يوم وانا على طريقي الخروج من سينغا باي لاحظت مساجد كثيرة جنب بعض ولكن المسجد اللي وقفت عنده كان من تمويل احدى الجمعيات الخيرية في الخليج. بصراحة ماعجبني كثرة المسايد في هالمناطق وكأن هالشعوب ماتبي شي الا مسايد, كثرتها بشكل مبالغ فيه جدا ومبني من اعمال الخير في الخليج, مثلا تتبرع ب70 الف ولكن تكلفة البنيان ماتزيد على 3000 دولار, غير ذلك الابار المبنية كلها جافة وجودة البناء سيئة جدا, من كثرتها تلقى بعضها فاضي. ملاوي محتاجة تعليم, بنية تحتية, مدارس, ووظايف ومهن حرفية أكثر من المساير والابار الجافة!

الابار الجافة من اول بنيانها لارضاء المتبرعين

الشاطيء الرائع في سينغا باي

هذا الاسبوع يعتبر اشبوع عبور الحدود في هذه المغامرة! عبرت ملاوي زامبيا بوتسوانا والحين في ناميبيا. دخول زامبيا طلع وايد اسهل من طلب اصدار تأشيرتها واللي تطلب مني 3 شهور انتظار واتصالات. ما انكر اني لازم أشكر الحسناء والمجتهدة من لبنان الاستاذة خديجة اللي تشتغل في سفارة قطر هناك لولا جهودها كنت الحين احوس القى منفذ اوصل فيه الى بوتسوانا. بصراحة اعتبرها من الداعمين لهذه الرحلة على جهودها. قضيت 4 ايام في زامبيا عبرت فيها 3 مناطق من ضمنهم لوساكا العاصمة وهذه المدينتين اللي نمت فيهم ماكان فيهم شي يذكر غير المسارات الطويلة والطرق المملة والحرارة العالية اثناء قيادة الدراجة. الجزء الاجمل واللي اعتبره الاجمل اطلاقا في الرحلة هو وصولي الى ليفنقستون اللي نمت فيها ليلتين علشان اشوف شلالات فيكتوريا العظيمة فيها, واخذ رحلة بالهيلكوبتر فوق الشلالات, زيارة جسر فيكتوريا اللي يربط زيمبابوي وزامبيا, واللي كنت متحمس من قلب اني اقفز قفزة البنجي جمب قبلها بيوم! بس ثاني يوم قعدت افكر شنو لو صادتني سكتة قلبية. او طق علي ظهري؟؟ او فرط الحبل؟ وراي رحلة خل اخلصها اول بعدين اتفرغ لهالجنون! مايصير جنون في جنون! نعوذت من ابليس وهونت! ورجعت الفندق خذت لفة بالهيلكوبتر مع يوبي وكيفن وآن وبول وجوليا, وهالشي كان أشبه بالحلم من الواقع, لحد كتابتي لهذه الكلمات مب مصدق اني سويت هالشي. اشياء مانشوفها الا في افلام جيمس بوند! وبعدها على طول رحنا سبحنا في بركة الشيطان وهي على حافة شلالات فيكتوريا واعتقد هالشي اكثر جنون من قفزة البنجي! ناس وايد من اللي شافوا الفيديو ماصدقوا ان هذا واقع! وفي نفس الاسبوع عبرت الى بوتسوانا لمدة ليلة وحدة قبل الدخول الى ناميبيا. بوتسوانا مليانة فيلة وخراتيت وتماسيح وأسود! شفتهم كلهم من خلال رحلة على النهر حتى غروب الشمس وعقبها بوفيه عشا كبير ونمت حتى ثاني يوم استعدادا لدخول ناميبيا! البلد اللي طلعت عيني علشان احصل فيزتها! واخيرا صارت وكنت قلق اني مادخل لأي سبب من الاسباب ولكن الدخول كان أسهل حتى من زامبيا! الاسبوع الجاي بقول لكم شصار في ناميبيا واللي هي اوعر شي والطرق اخطر شي من ناحية الوعورة